सामाजिक रुपान्तरणका लागि युवाः सुरक्षित आप्रवासनको प्रवद्र्धन तथा मानव बेचविखन रोकथामका लागि युवा परिचालन परियोजना कार्यक्रम इलामका पालिकामा बढ्दो रहेको छ ।
मानव बेचविखनको न्यूनीकरणका लागि सुरक्षित रोजगारी र सुरक्षित आप्रवासनका लागि सचेतना र सहयोग गर्ने, सामाजिक संरचनाको विकास, प्रवद्र्धन, सञ्जालीकरण र पैरवी गर्ने तथा जीविकोपार्जनका बैकल्पिक उपायहरुको खोजी र सीप विकास मार्फत स्वरोजगार, उद्यम र स्थानीय स्तरमै जिविकोपार्जनका लागि सहयोग गर्ने उद्देश्यका साथ परियोजना संचालन भएपछि पालिकामा बढ्दो रहेको हो ।
एडब्लुओ इन्टरनेशनलको सहयोगमा मानव अधिकार मञ्च नेपाल इलामको आयोजनामा इलामका रोङ गाउँपालिका र माई नगरपालिकामा परियोजना संचालन भईहेको छ । आगामी वर्ष मानव अधिका मञ्च नेपाल इलामको आयोजनामा माईजोगमाई र चुलाचुली गाउँपालिकामा परियोजना संचालन हुनेछ ।
विशेषगरी १८ देखि ३० वर्ष उमेर समुहका युवाहरुका लक्षित कार्यक्रम प्रभावकारी देखिएको मानव अधिकार मञ्च नेपाल इलामका अध्यक्ष मोहनसिंह थेवेले बताए । परियोजना अन्तरगत सुरक्षित आप्रवासनका लागि २ वटै पालिकाका सबै घरधुरी र ४ वटा परामर्श केन्दबाट ५ हजार बढीले नियमित परामर्श सहयोग पाएका छन् । युवा सशक्तिकरण समुहमा संगठित भई ३ सय २० जना युवाले सचेतनामूलक तालिम लिई सुरक्षित आप्रवासनमा क्रियाशिल रहेको तथा स्थानीय समुदायमा सचेतनामा क्रियाशिल रहेको तथ्याङक सार्वजनिक गरिएको छ ।
त्यस्तै २ सय ४१ जना उद्यमशीलता विकास र व्यवसायिक योजना निर्माणको तालिम प्राप्त भई व्यवसायमा संलग्न भएको, ६९ जना सीप विकास तालिम लिई व्यवसाय सुरुवात गरेको र करिब १ सय जनाले उद्योग तथा व्यवसाय समेत सुरुवात गरेको प्रतिवेदनमा उल्लेख छ ।
परियोजना अन्तरगत समूह गठनदेखि विभिन्न सीपमूलक तथा उद्यमशीलता तालिम संचालित गरिएका छन् । सीपमूलक तालिम अन्तरगत केराको खाद्य परिकार बनाउने, बाख्रापालन, कुखुरापालन, च्याउ खेती, वेमौसमी तरकारी खेतीलगायतको तालिम संचालन गरि युवाहरुलाई आत्मनिर्भर बनाउन उत्प्रेरित गरिएको छ । यो परियोजना देशभरका ३९ जिल्लामा संचालन भईरहेको छ । सन्दकपुरअनलाईन
