मकवानपुरको भीमफेदी गाउँपालिका–५ की ८४ बर्षीया टीकाकुमारी पाख्रिन सम्बन्धविच्छेदको निवेदन लिएर जिल्ला अदालत पुगेपछि त्यहाँका कर्मचारी नै छक्क परे ।
किनकी जिल्लामा सबैभन्दा बढी उमेरकी बृद्धाले निवेदन लिएर आएको यो पहिलो घट्ना हो ।
‘अदालतमा सम्बन्धविच्छेदका मुद्दा धेरै छन्,’ स्रेस्तेदार केशबराज कौशिक भन्छन्, ‘चारबीस पार गरिसकेकी बृद्धाले सम्बन्धविच्छेदको माग गरेको यो पहिलो घट्ना भयो ।
७० बर्षीय श्रीमान बुद्धबहादुर रुम्बासँग अशंसहित सम्बन्धविच्छेदको माग गर्दै उनी लौरोको सहारामा गत मंसिर २५ गते अदालत पुगेकी थिइन् । उनका पाँच छोरा र एक छोरी छन् ।
विवाह भइसकेका उनीहरु अलग छन् । श्रीमानले १९ बर्षअघि कान्छी भित्र्याए पनि टीकाकुमारी सहज रुपमा बसिरहेकी थिइन् । तर पछिल्लो समय श्रीमानले कुटपिट गर्ने गरेको उनको भनाइ छ ।
