राप्ती नगरपालिका–१ लोथरस्थित पूर्व–पश्चिम राजमार्गमा दुईवटा ट्रक ठोक्किँदा एकजनाको मृत्यु भएको छ। मृत्यु हुनेमा मकवानपुरको हेटौडा उपमहानगरपालिका–१४ का २६ वर्षीय वीरबहादुर लोप्चनको रहेको जिल्ला प्रहरी कार्यालय चितवनले जनाएको छ ।
पूर्वबाट पश्चिमतर्फ गइरहेको ना ५ ख ८७४३ नम्बरको ट्रक र विपरीत दिशातर्फबाट गइरहेको ना ६ ख ७९६७ नम्बरको ट्रक सोमबार बिहान साढे ७ बढे ठोक्किँदा चारजना घाइते भएका थिए। घाइतेमध्ये ना ५ ख ८७४३ नम्बरको ट्रक चालक लोप्चनको पुरानो मेडिकल कलेजमा उपचारका क्रममा विहान ८ः२५ बजे मृत्यु भएको प्रहरी नायब उपरीक्षक एकनारायण कोइरालाले बताए।
ना ६ ख ७९६७ नम्बरको ट्रकका चालक झापाको कन्काइ नगरपालिका–१ का ४० वर्षीय अर्जुन जोगी, सोही ट्रकका सहचालक मोरङका २० वर्षीय प्रज्ज्वल देवान र ना ५ ख ८७४३ नम्बरको ट्रकका सहचालक मकवानपुरको बाग्मती गाँउपालिका–१ का २० वर्षीय सोमबहादुर थिङको पुरानो मेडिकल कलेजमा उपचार भइरहेको छ। उनीहरु खतरामुक्त रहेको बताइएको छ।
