पथरी, मोरङको पथरी शनिश्चरे नगरपालिकाले सञ्चालन गरेको लैङ्गिक हिंसा विरुद्धको १६ दिने अभियान अन्तर्गत मंगलबारसमापन कार्यक्रम हुने भएको छ ।
प्रदेश नम्वर १ का आन्तरिक मामिला तथा कानून मन्त्री हिक्मत कार्कीको प्रमुख आतिथ्यतामा चेतनामुलक कार्यक्रमका साथ पथरी बहुमुखी क्याम्पसमा लैङ्गिक हिंसा विरुद्धको तेस्रो तथा अन्तिम कार्यक्रम हुने भएको हो ।
लिङ्गका आधारमा हुने हिंसालाई हटाउने सन्देश प्रवाह गर्न विद्यालयस्तरीय कविता प्रतियोगिता, सन्देशमुलक कचहरी नाटक सहितका प्रस्तुतिहरुका साथ कार्यक्रम सम्पन्न गरिने नगर उपप्रमुख यमुना विष्ट वास्तोलाले जनाउनु भयो । यसका साथै विद्यालयका विद्यार्थीबीच म्यूजिकल चियर्स र हण्डिफोर प्रतियोगिता तथा नृत्यका प्रस्तुतिहरु समेत रहने पथरीतर्फको कार्यक्रम संयोजक मैनादेवी फुयँल आचार्यले जनाउनु भयो । पथरीमा हुने कार्यक्रममा मुख्य रुपमा वडा नम्वर १, २, ३, ७ र १० का विद्यालय, संघ संस्थाहरु सहभागि हुनेछन् ।
शरणार्थी सम्वन्धि राष्ट्रसंघीय उच्चयोग (यूएनएचसीआर) र लुथरन विश्व फेडेरेशन (एलडब्लुएफ) को समेत सहकार्य र भूटानी शरणार्थीहरुको सहभागितामा कार्यक्रम समापन हुने भएको छ । यस अघि हसन्दह र शनिश्चरेमा यसै प्रकारका कार्यक्रम सम्पन्न भएका छन् ।
