रौतहटको राजपुरमा बाह्र बर्ष अघि भएको बमकाण्डमा पक्राउ परेका कांग्रेस नेता मोहम्मद अफताब आलमको बयान आज पनि हुँदैछ । आलममाथि कर्तब्य ज्यान, ज्यान मार्ने उद्योग र बिस्फोटक पदार्थ भण्डारणको अभियोग लगाएर जन्मकैद सहितको सजाय माग गरी जिल्ला सरकारी वकिलको कार्यालयले अभियोग पत्र दर्ता गरेको थियो ।
आज बयान सकिएपछि थुनछेक बहस सुरु गर्ने जिल्ला न्यायाधिवक्ता खडिन्द्रराज कटवालले बताउनुभयो । यसअघि नै प्रहरीले करिब साढे २ सय जनाको बयान, प्राप्त प्रमाण र अनुसन्धानका क्रममा तयार भएको मिसिलको विवरण जिल्ला अदालतमा बुझाएको छ ।
करिब आठ सय पृष्ठभन्दा लामो आरोपपत्र सहितको प्रतिवेदनमा आलमले ‘पोलिग्राफ’ परीक्षणमा सामेल हुन इन्कार गरेको समेत उल्लेख छ । आलमले अदालतमा समेत ईन्कारी बयान दिएको अदालत स्रोतले जनाएको छ ।
बम बिस्फोटमा परी घाइते भएका सरुअठाका त्रिलोकप्रताप सिह र ओसि अख्तरलाई जिउँदै इँटाभट्टामा जलाएर मारेको आरोपमा आलम, उनका भाई महताब आलम लगायत ११ जनालाई प्रतिवादी बनाइएको छ । आलमले बम विस्फोटका घटनामा घाईते भएकालाई जिउँदै इट्टाभट्टामा हालेको प्रत्यक्षदर्शीले बयाद दिएका छन् ।
