१६ आश्विन २०७६, बिहीबार
अपाङ्गता जन्मदर न्यूनीकरण गर्ने गरि प्रदेश सरकारले अपाङ्गता रोकथाम तथा पुनःस्थापना कार्यक्रम सञ्चालनमा ल्याइएको प्रदेश नम्बर १ का सामाजिक विकासमन्त्री जीवन घिमीरेले बताएका हुन् ।
सुनसरीको इटहरीमा प्रदेश नम्बर १ सामाजिक विकास मन्त्रालयले आयोजना गरेको अपाङ्गता रोकथाम तथा पुनःस्थापना कार्यक्रमसम्बन्धी अभिमुखिकरण कार्यक्रममा मन्त्री घिमिरेले अपाङ्गता जन्मदर न्यूनीकरणका लागि प्रदेश सरकारले पहल थालेको प्रस्ट्याए ।
अपाङ्गता न्यूनीकरण रोकथाम, अपाङ्गता जन्मदर घटाउने जस्ता विषय केन्द्रीत भएर प्रदेश सरकारले पहिलो चरणमा सुनसरी, मोरङ, धनकुटा र पाँचथरका २७ गाउँपालिकाहरुमा कार्यक्रम सञ्चालनमा ल्याउने अन्तिम तयारी भएको मन्त्री घिमीरेले जानकारी दिए ।
छनोटमा परेका स्थानीय तहहरुमा प्रदेश सरकारको तर्फबाट ३३ प्रतिशत, करुणा फाउण्डेसनबाट ३३ प्रतिशत र स्थानीय सरकारबाट ३३ प्रतिशत खर्च बेहोर्ने गरी अपागंतासम्बन्धी कार्यक्रम सञ्चालन गरिने जानकारी गराइयो ।
कार्यक्रमका विषयमा छनोटमा परेका स्थानीय तहका प्रमुख, उपप्रमुख र प्रशासकीय अधिकृतहरु सहभागी कार्यक्रममा सामाजिक विकास मन्त्रालयका सचिव बीरबहादुर राई , करुणा फाउण्डेसन नेपालका दिपकराज सापकोटा, योगेन्द्र गिरीलगायतका अपागंता रोकथाम, जन्मदर घटाउने, हक अधिकार संरक्षण लगायतका विषयमा सहजिकरण गरे ।
