आश्विन १२, २०७६
नेपालीहरुको प्रमुख चाड बडादशैँ घर–घरमा घटस्थापना गरी आजबाट सुरु हुँदैछ । आज आ –आफ्नो पुजा कोठा वा दशैँघरमा विधिपुर्वक दियो, कलश र गणेशको पुजा गरी माटोको पुर्ण घडामा गाईको गोबर राखी घाम नछिर्ने अँध्यारो कोठामा जौ मकै रोपेर जमरा राख्ने गरिन्छ ।
राष्ट्रिय पञ्चाङ्ग निर्णायक समितिका अनुसार आज बिहान १० बजेर ३५ मिनेट घटस्थापनाका लागि शुभ मानिएको थियो । आज घर–घरमा राखिने जमरा विजया दशमीका दिन टिकासँगै समृद्धिको प्रतिकको रुपमा लगाउने गरिन्छ । हनुमान ढोका दरबारमा रहेको दशैँ घरमा वैदिक विधिपुर्वक जमरा राखी महाकाली, महालक्ष्मी नवदुर्गा र अन्य शक्ति पिठहरुमा नवरात्री पुजाको शुभारम्भ हुन्छ ।
आजदेखि दशैँ अवधिभर नवरात्रपर्व मेलाका रुपमा शक्तिपिठ तथा घटस्थापना गरिएका स्थानमा घरमुली वा पण्डित पुरोहितद्धारा सप्तशती चण्डी र भगवती स्तोत्र पाठ गर्ने चलन छ । पञ्चाङ्ग निर्णायक समितिले यसवर्ष टिकाको साईत विहान १० बजेर ३५ मिनेटमा उत्तम रहेको जनाएको छ ।
