शुक्रबार ०३, असोज २०७६
हजारको नोटमा रहेको हात्तीको तस्वीर फेरिने भएको छ । नेपाली नोटमा रहेको हात्तीको फोटो नेपालकै हो वा होइन, पक्का नभएपछि हात्ती नै फेर्न लागिएको हो ।
नेपाल राष्ट्र बैंकका अनुसार अब नेपालमै जन्मिएका जुम्ल्याहा हात्ती राम–लक्ष्मणको पोट्रेट तस्बिर छापिएका हजारका नोट अर्को दशैंसम्म आइसक्नेछन् । ती हात्ती चितवन राष्ट्रिय निकुञ्जको खोरसोर हात्तिसारमा ८ वर्षअघि जन्मिएका हुन् ।
अहिले नोटमा छापिएको हात्तीलाई भने केही व्यक्तिले अफ्रिकी भनेका छन् । हात्तीकै विषयमा विद्यावारिधी गरेका नरेन्द्र प्रधान भने यसलाई एसियाली नै ठान्छन् । नोटमा छापिएका हात्तीको दाह्रा र कानले इण्डोनेशिया वरपरको सुमात्रा टापुमा पाइने हात्तीजस्तो देखिएको विज्ञहरु बताउँछन् । यद्यपि, पोट्रेट भएकाले यसको पुष्टि गर्न कठीन हुने डा. प्रधानको आँकलन छ ।
नयाँ नोटमा जुम्ल्याहा हात्तीको तस्वीर राख्न खोज्नुको कारण भने अर्कै छ । संसारमै दुर्लभ हुने जुम्ल्याहा हात्ती नेपालमा पाइएकाले त्यो दुर्लभतालाई समावेश गर्न खोजिएको हो । एसियाका नेपाल र थाइल्याण्डमा मात्रै हात्तीले जुम्ल्याहा बच्चा जन्माएको ‘रेकर्ड’ छ ।
