राजकुमारी तामाङ
भदौ १७, २०७६ पथरी
मोरङको कानेपोखरी गाउपालिकामा बर्डफ्ल्युको संक्रमण भेटिएपछि २२२ कुखुरासहितका पंक्षी नष्ट गरिएको छ । कानेपोखरी–३ हरकपुरमा रहेको यसोधरा कृषि फर्ममा पालिएका हाँस, टर्की, स्थानीय कुखुरा र बट्टाईमा बर्डफ्ल्युको संक्रमण देखिएको भेटेरिनरी अस्पताल तथा पशु ज्ञान केन्द्र मोरङ का प्रमुख सुशील अधिकारीले जानकारी दिएका छन् ।
त्यस फर्ममा रहेका कुखुरा बिहीबार मर्न थालेपछि फर्मका संचालक श्री प्रसाद मिश्रले पशु प्रयोगशाला बिराटनगर र केन्द्रीय पशु प्रयोगशाला त्रिपुरेश्वरको टोलीलाई खबर गरेका थिए । सो परिक्षण टोलीले जाच पश्चात् बर्डफ्ल्यु भएको पुष्टि गरेको थियो । रोगको संक्रमण भएको भन्दै सोमबार फर्ममा पालिएका २२२ पंक्षी नष्ट गरिएको हो ।
फर्मका संचालक श्री प्रसाद मिश्रका अनुसार भदौ १४ गते नै २ सय भन्दा बढी कुखुरा मरेका थिए । उनका अनुसार सो फर्मबाट ५० लाख बराबरको नोक्सान भएको छ ।
भेटेरिनरी अस्पताल तथा पशु ज्ञान केन्द्र मोरङका प्रमुख अधिकारीका अनुसार रोगको संक्रमण फैलिएको स्थानमा सिल गरिएको छ भने सोमबार नै फर्ममा रहेको १५ क्विन्टल कुखुराको दानाको कच्चा पर्दाथ र ४ मन दाना समेत नष्ट गरिएको छ ।
