मङ्गलबार १७, भदौ २०७६
रामेछापको लिखु तामाकोशी गाउँपालिकाका अध्यक्ष गोविन्दबहादुर खड्काले उपाध्यक्षसहित ५ जनालाई काराबाहीका लागि किटानी जाहेरी दिएका छन् ।
दुई करोड चन्दा नदिए ज्यान मार्ने धम्की दिएको भन्दै जाहेरी दिएका हुन् ।
उपाध्यक्ष दीपशिखा न्यौपाने दाहाल, वडा अध्यक्ष सुवास बोहोरा, नेकपाका नेता सञ्जीव कार्की, लोप्सन भनिने बाबुराम तामाङ र अमृत तामाङविरुद्ध मुद्दा दायर गरेको हो ।
उपाध्यक्ष दाहाल र वडा अध्यक्ष बोहोराले बाबुराम तामाङलाई प्रयोग गरी २ करोड माग गर्न लगाएको र नदिए आफू र परिवारका सदस्यलाई मार्ने सम्मको धक्की दिएको आरोप खड्काले लगाउँदै आएका छन् । नेकपाका नेता कार्की समेत प्रहरीको अनुसन्धानबाट दोषी देखिएकाले उनलाई समेत प्रतिवादी बनाएर मुद्दा दायर भएको खड्काले वताए ।
तर दाहाल र बोहोराले भने विकास निर्माणका कुरामा पारदर्शिता खोज्दा झुटा अभियोग लागेको दावी गरे ।
विद्युतीकरण गर्दा लागेको खर्च भन्दै अध्यक्ष खड्काले ६ करोड ९५ लाख रुपैया माग गरेपछि अनुगमन समितिकी संयोजक समेत रहेकी उपाध्यक्ष दाहाल र वडा अध्यक्षहरुले प्रस्ताव अस्वीकार गरेका थिए ।
अनुगमन गरी लागेको पैसा विनियोजन गर्ने उनीहरुको अडान अध्यक्षलाई स्वीकार्य नभएपछि कार्यपालिकाको बैठकमा झगडा भएको थियो ।
