राजपाको अध्यक्ष मण्डल दुई धारमा देखियो

भाद्र १२, २०७६
शुक्रबारका लागि बोलाइएको राजनीतिक समितिको बैठकको विषयलाई लिएर राष्ट्रिय जनता पार्टी राजपाको अध्यक्ष मण्डल दुई धारमा विभाजित भएको छ । अवैधानिक रुपमा बैठक बोलाएको भन्दै अध्यक्ष मण्डलका सदस्यहरु महन्थ ठाकुर, राजेन्द्र महतो, महेन्द्रराय यादव र शरदसिंह भण्डारीले विरोध जनाएका छन् ।
उनीहरुले अध्यक्ष मण्डलको सहमति विपरीत बोलाइएको बैठक हुन नसक्ने बताएका छन् । अध्यक्ष मण्डलका संयोजक राजकिशोर यादवले बोलाएको बैठकलाई अध्यक्ष मण्डलका सदस्य अनिल झाको मात्रै समर्थन छ ।
समाजवादी पार्टीसँग एकीकरणको प्रकृया चलिरहेका बेला त्यसलाई बिथोल्ने नियतबाट राजनीतिक समितिको बैठक बोलाइएको अध्यक्ष मण्डलका चार नेताको भनाई छ ।
यादव र झा पार्टीको महाधिवशेन अघि पार्टी एकीकरण गर्न नहुने पक्षमा छन् । अन्य नेताहरु तत्काल पार्टी एकीकरण गरेर एकता महाधिवेशन गर्नुपर्ने पक्षमा छन्
नेता भण्डारीले अवैधानिक रुपमा बोलाइएको राजनीतिक समितिको बैठकको आवश्यकता र औचित्व समेत नभएकाले नबस्ने दाबी गर्नुभयो । यद्यपि, संयोजक यादवले भने पार्टीको संयोजकलाई बैठक बोलाउने अधिकार भएको बताउनुभयो ।
उहाँले समसामयिक राजनीति, पार्टीको महाधिवेशन, एकता प्रकृया लगायतका विषयमा छलफल गर्न बैठक आहृवान गरेको बताउनुभयो ।