ताप्लेजुङ–चिरपरिचित प्रतिद्धन्द्धी विभागीय त्रिभुवन आर्मी क्लबलाई पराजित गर्दै अर्काे विभागीय टोली नेपाल पुलिस क्लब तेस्रो पाथीभरा राष्ट्रिय पुरुष भलिबल प्रतियागिताको च्याम्पियन बनेको छ । ताप्लेजुङको मैवाखोला गाउँपालिकास्थित साँघुमा बिहीबार भएको उपाधि भिडन्तमा पुलिसले आर्मीमाथि ३–० को सोझो सेटमा जित निकाल्दै लगातार दोस्रोपटक च्याम्पियन बनेको हो । पुलिस दोस्रो संस्करणमा पनि च्याम्पियन बनेको थियो ।
फाइनल खेल प्रतिस्पर्धात्मक हुने अनुमान गरिएपनि खेल एकपक्षीय बनेको थियो । पुलिसले पहिलो सेट २५–१९ ले सहजै आफ्नो पक्षमा पारेको थियो । दोस्रो र तेस्रो सेट पनि पुलिसले २५–१७ र २५–१३ ले जित्न सफल भयो ।
च्याम्पियन बनेसँगै पुलिसले ३ लाख ५१ हजार ५ सय रुपैया पायो । दोस्रो भएको आर्मीले १ लाख ७६ हजार २ सय ५१ रुपैयाँमा चित्त बुझायो । सेमिफाइनलमा पराजित भएका एपीएफ र गण्डकी प्रदेशले समान ५०–५० हजार रुपैया प्राप्त गरे । प्रतियोगिताको सर्वाेत्कृष्ट खेलाडीले १५ हजार पाए । व्यक्तिगत विधामा उत्कृष्ट हुने सर्भर, डिफेन्डर, ब्लकर, क्विकर, स्पाइकर र प्रशिक्षकले समान ७ हजार रुपैयाँ पायो ।
मैवाखोला गाउँपालिकाको व्यवस्थापन र जलजले युवा क्लबको आयोजनामा भएको प्रतियोगितामा ८ टोलीको सहभागिता रहेको थियो ।
प्रतियोगिताका व्यक्तिगत पुरस्कार
सर्वाेत्कृष्ट खेलाडी – कुल बहादुर थापा (पुलिस)
स्पाईकर – धनबहादुर भट्ट (आर्मी)
सेटर – इम बहादुर राना (पुलिस)
डिफेन्डर – भीम गाहा (पुलिस)
सर्भर – विशाल विक (पुलिस)
ब्लकर – दिपकराज जोशी (पुलिस)
प्रशिक्षक – सरोज श्रेष्ठ (पुलिस)
