सुमन श्रेष्ठ, अमरदह
प्रदेश स्तरीय तेस्रो अमरदह ढल्के जोवन गोल्डकपमा सगरमाथा भेट्रान विराटचोक अघिल्लो चरणमा उक्लिएको छ । सि.भि.सि भेट्रान चन्द्रगढी ४–० गोल अन्तरले पराजित भएको छ ।
विराटचोकका तर्फबाट चारवटै गोल दोस्रो हाफमा भएको थियो । जर्सी नं. ७ का टेक बहादुर लिम्बूले दोस्रो हाफको २ मिनेटमा नै गोल गरेर टिमको खाता खोलेका थिए । पूनः १० नंं. जर्सीका प्रेम बहादुर लिम्बूले १७ मिनेटमा १ गोल थपेर आफ्नो टिममा अंक दोब्बर बनाए । यस्तै २० मिनेटमा पूनः ११ नं. का खेलाडी खगेन्द्र खड्काले १ गोल थपे लगत्तै २१ मिनेटमा जर्सी नं. ७ का टेक बहादुर लिम्बूले पूनः व्यक्तिगत दोस्रो गोल गर्दै टिमलाई जित दिलाए ।
बुधबारको खेलमा २ गोल गर्न सफल विराटचोकका खेलाडी टेक बहादुर लिम्बू म्यान अफ द म्याच घोषित भए । खेल अवधिभर निरिह बनेको सि.भि.सि. चन्द्रगढी भने खाता खोल्न सकेन र खेलबाट बाहिरियो । खेलको १९ औँ मिनेटमा चन्द्रगढीका खेलाडी लक्ष्मी नारायण श्रेष्ठले पहेलो कार्ड पाएका थिए ।
विहिबारको खेल शसस्त्र प्रहरी बल पकली सुनसरी र लेटाङ भेट्रान मोरङ बिच हुने आयोजकले जानकारी दिएको छ । प्रदेश १ कै सबैभन्दा ठुलो धनराशीको तेस्रो अमरदह ढल्के जोवन गोल्डकप सुनवर्षी २ अमरदहमा रहेको विरेन्द्र सार्वजनिक मा.विको खेल मैदानमा बैसाख २१ गते देखि भइरहेको छ ।
