सुनसरी, प्रधानमन्त्री केपी शर्मा ओलीको सुनसरी आउने कार्यक्रम स्थगित भएको छ । सुनसरीको चतरामा आजबाट आयोजना हुने अर्धमहाकुम्भ मेलाको उद्घाटन गर्न प्रधानमन्त्री केपी शर्मा ओली आउने कार्यक्रम थियो । तर शनिबार बिहानैदेखि मौसममा आएको खराबीका कारण प्रधानमन्त्री आउने कार्यक्रम स्थगित भएको हो ।
प्रधानमन्त्री नआएपछि कुम्भमेलाको उद्घाटन प्रदेश १ का मुख्यमन्त्री शेरधन राईले गर्ने छन् । अर्धमहाकुम्भ मेलामा प्रधानमन्त्री सहभागी हुने कार्यक्रम स्थगितपछि उनले आफ्नो लिखित सम्बोधन पठाएका छन् । शनिबारदेखि सुरू मेला एक महिना सम्म चल्नेछ । चतरामा आयोजित दोस्रो अर्धमहाकुम्भ मेलालाई प्रदेश सरकारले पनि सहयोग गरेको छ ।
आन्तरिक मामिला तथा कानुन मन्त्री हिक्मत कार्कीको संयोजकत्वमा मेला संयोजन समिति गठन गरेको प्रदेश सरकारले मेलाका लागि ५० लाख सहयोग पनि गरेको छ ।