‘ए’ डिभिजन प्रतिद्धन्द्धी ललितपुरको रुस्लान थ्री स्टारलाई पराजित गर्दै विभगीय त्रिभुवन आर्मी क्लब तेस्रो मन मोहन मेमोरियल दुहवी गोल्डकप फुटबल प्रतियोगिताको फाइनलमा प्रवेश गरेको छ ।
सुनसरीस्थित दुहवी रंगशालामा बुधबार भएको सेमिफाइनलमा आर्मीले थ्री स्टारलाई २–० ले पराजित गर्दै प्रतियोगिताको उपाधिनजिक पुगेको हो ।आर्मीको जितमा कप्तान भरत खवास र टेक बहादुर बुढाथोकीले गोल गरे । दुवै गोल दोस्रो हाफमा सम्भव भएको थियो ।
खेलको ५१औं मिनेटमा कप्तान भरत खवासले गोल गर्दै आर्मीलाई अग्रता दिलाएका थिए । ६६औं मिनेटमा टेक बहादुर बुढाथोकीले गोल गर्दै आर्मीलाई २–० को जित दिलाए । आर्मीका कप्तान भरत खवास खेलको म्यान अफ दि म्याच घोषित भए । उनले जनही १० हजार रूपैया पाए ।
प्रतियोगितामा बिहीबार दाउफिन्स फुटबल परिवार क्यामरुन र मेची नेत्रालय काकरभित्ता फुटबल ट्रेनिङ सेन्टरबीच दोस्रो सेमिफाइनल खेल हुनेछ । विजेताले शनिबार उपाधिका लागि आर्मीसँग खेल्नेछ ।
