मकवानपुर, हेटौंडामा सम्पन्न दोस्रो शहीद स्मृति मकवानपुर गोल्डकप २०७५ को उपाधि आयोजक मकवानपुर –११ जितेको छ ।
प्रतियोगिताको फाइनल खेलमा क्यामरुनको दाउफिन्स क्लबलाई २–१ गोल अन्तरले हराउँदै मकवानपुर ११ ले उपाधि जित्न सफल भएको हो । मकवानपुरका तर्फबाट दुवै गोल योगेश गुरुङले गर्न सफल भए । उनले खेलको ८ औं र ८१ औं मिनेटमा गरेको गोलले नै टिमलाई उपाधि जिताउन सफल भयो ।
यता दाउफिन्सका तर्फबाट खेलको चौथो मिनेटमा यानीको वानाले गोल गरेका थिए । त्यसपछी दाउफिन्सले कुनैपनि गोल गर्न नसकेकाले मकवानपुरे खेलाडीले आफ्नै खेलमैदानमा उपाधि जित्न सफल भए ।
विजयी भएसँगै मकवानपुर ११ ले आठ लाख रुपैयाँ नगद, शील्ड, पदक र प्रमाणपत्र हात पारेको छ । विजयी टिमलाई हेटौंडा उपमहानगरपालिकाका मेयर हरिबहादुर महतले पुरस्कार प्रदान गरे । यसैगरी दोस्रो हुने दाउफिन्सले नगद ४ लाख रुपैयाँ, शील्ड, पदक र प्रमाणपत्र हात पार्न सफल भएको छ ।
सर्वाेत्कृष्ट खेलाडी घोषित मकवानपुर ११ का गोलकिपर असोक बराललाई ७५ हजार रुपैयाँ प्रदान गरिएको छ ।
