मकवानपुर, नेपालको चर्चित क्लब रुस्लान थ्री स्टारलाई पराजित गर्दै दाउफिन्स फुटबल क्लबले दोस्रो संस्करणको भूगर्भ सिमेन्ट सहिद स्मृति राष्ट्रिय फुटबल प्रतियोगिता २०७५ को उपाधिका आयोजक मकवानपुर–११ भिड्ने भएको छ ।
हेटौंडा–१० स्थित वनविज्ञान खेल मैदानमा जारी प्रतियोगिताको दोस्रो सेमिफाइनलमा विहिबार थ्रीस्टारलाई टाइब्रेकरमा ५–३ ले पराजित गर्दै दाउफिन्सले फाइनलमा आयोजकसँग भेट पक्का गरेको हो । निर्धा्रित समय १–१ गोलको बराबरीमा टुंगिएसँगै खेलको नतिजाका लागि टाइब्रेकरको सहारा लिइएको थियो ।
टाइब्रेकरमा दाउफिन्सका तर्फबाट एंगमा एंगोल, बिजिक बिजिक, प्रिसो एम्जाम्बे, हान्सा एसा र यानिक ओआनाले गोल गरेका थिए । थ्रीस्टारको तर्फबाट रञ्जित धिमाल, मान्सा र विजय धिमाले गोल गरे । भरपर्दा तथा अनुभवी खेलाडी अनिल गुरुङको प्रहार भने बाहिरिएको थियो ।
खेलको ६० औं मिनेटमा दाउफिन्सका यानिक ओवानाले गोल गर्दै टोलीलाई अग्रता दिलाएका थिए । ओवानाले बिजिक बिजिकले गरेको क्रसमा हेड गर्दै गोल गरेका थिए । थ्रीस्टारका रञ्जन विष्टले ७० औं मिनेटमा गोल गर्दै खेललाई बराबरीमा ल्याए । रञ्जनले दाउफिन्सको गोलरक्षक र डिफेन्सविच तालमेलको अभाव भइरहेको समयमा गोलरक्षकलाई विट गर्दै सहजै गोल गरे । थ्रीस्टारका गोलरक्षक एलन न्यौपानेले खेलभर दाफिन्सका थुप्रै प्रहार बचाएका थिए ।
खेलको म्यान अफ दी म्याच थ्रीस्टार क्लबका डिफेन्डर जीवन गुरुङ घोषित भए । उनले नगद दश हजार रुपियाँ प्राप्त गरे । खेलपश्चात् थ्रीस्टारका प्रशिक्षक मेघराज केसीले खेलाडीको प्रदर्शनबाट आफू सन्तुष्ट रहेको प्रतिक्रिया दिए । उनले दाफिन्सले धेरै फाउल खेलेको र आफूहरुले समयमै रेफ्रिलाई सजग नगराए धेरै खेलाडी अस्पतालमा भर्ना हुने अवस्था सिर्जना हुने बताए । थ्रीस्टारका कप्तान एलन न्यौपानेले भाग्यले साथ नदिँदा खेलमा पराजित भएको बताए ।
दाउफिन्सका टिम व्यवस्थापक आशिक थापा मगरले खेलाडीले समयमै गोल नगर्दा केही समस्या परेको दावी गरे । उनले प्रतियोगिताको फाइनलमा अझै सुधारिएको खेल खेल्ने दावी समेत गरे । उनले रेफ्रिले समयमै निर्णय लिन नसक्दा खेलमा केही तनावको अवस्था सिर्जना भएको बताए ।
प्रतियोगिताको फाइनल खेल चैत १६ गते शनिबार हुनेछ । प्रतियोगिताको विजेताले आठ लाख र उपविजेताले चार लाख रुपैयाँ प्राप्त गर्नेछ ।
