पथरी, मोरङको पथरीशनिश्चरे नगर क्षेत्रमा सञ्चालित स्वास्थ्य क्षेत्रका कार्यक्रम प्रभावकारी रहेको चर्चा भइरहेको बेला अभ्यास अध्ययनका क्रममा आएका स्वास्थ्य विषयका विद्यार्थीहरुले पनि प्रभावकारी गतिविधि भएको निष्कर्ष निकालेका छन् । धरानस्थित वीपी कोइराला स्वास्थ्य विज्ञान प्रतिष्ठानका मास्टर इन पब्लिक हेल्थको दोस्रो वर्षका विद्यार्थीहरुले अध्ययनका क्रममा त्यस्तो तथ्य बाहिर ल्याएका हुन् ।
शुक्रबार पथरीशनिश्चरे नगर क्षेत्रको स्वास्थ्य चौकी, सहरी स्वास्थ्य केन्द्र सहितको अवलोकन र अध्ययनका क्रममा अन्य पालिका भन्दा पथरीशनिश्चरे प्रभावकारी देखिएको उनीहरुले बताए । ५ जनाको टोलीका सदस्य विश्वास सुवेदीले अन्यत्रका पालिकाहरुको स्वास्थ्य कार्यक्रम तीन तहको सरकारपछि अलमलिएको अवस्थामा पथरीशनिश्चरेले चाँही सामुदायिक सहकार्यका कार्यक्रमहरु समेत गर्नु प्रभावकारी कदम भएको समीक्षा गरे ।
सुवेदीका साथै डाक्टर विध्वता भट्टराई, डाक्टर पूजा देवकोटा, प्रतिमा भण्डारी र अनुपमा आलेले नगर प्रमुख दिलिपकुमार राई सहितका जनप्रतिनिधि तथा नगर स्वास्थ्य संयोजक मुरारी आचार्यलाई भेटी छलफल एवम् अन्तरक्रिया गरे । जिल्ला स्वास्थ्य समन्वय कार्यालयमार्फत १ महिनाको अध्ययनका क्रममा जिल्लाका विभिन्न स्वास्थ्य केन्द्रमा खटिएका छन् ।
सो नगरमा ८० वर्षमाथिकालाई घरघरमा गएर चेकजाँच, ७० वर्षमाथिकालाई प्रदेश नम्वर १ भरीमा निशुल्क एम्बुलेन्स सेवा, क्यान्सर, मृगौला सहितका ५ प्रकारका जटिल रोगीका लागि जीवनमा एक पटक १५ हजार सहयोग सहितका कार्यक्रमहरु छन् । यसका साथै हात्तीपाइले विरुद्धको औषधि खुवाउने अभियानमा स्थानीयको सक्रिय सहभागितामा ९० प्रतिशतलाई औषधि सेवन गराएर जिल्लामै नमूना काम गरिसकेको छ । खोप सहित अन्य स्वास्थ्यका गतिविधिमा नगरको सक्रियता रहेको छ ।
१० वटै वडामा स्वास्थ्य उपचार केन्द्र खडा गर्ने अभियानमा लागेको नगरमा हालसम्म वडा नम्वर १ मा सहरी स्वास्थ्य केन्द्र, २ मा ठूलो भवनमा स्वास्थ्य चौकी निर्माण भएको छ । सो स्वास्थ्य चौकीलाई अस्पतालको रुप दिने सरकारी प्रक्रिया थालिएको छ । ३ मा शहरी स्वास्थ्य केन्द्र, ५ मा हसन्दह स्वास्थ्य चौकी छ । ६ मा भर्खरै सहरी स्वास्थ्य केन्द्र खडा भई कर्मचारी नियुक्तिको प्रक्रिया अघि बढेको छ । ९ मा शनिश्चरे स्वास्थ्य चौकी छ । जसको दाताहरुले जग्गा दान दिएपछि व्यवस्थित भवन वन्दै छ । वाँकी रहेका ४ वटा वडामा पनि स्वास्थ्य निकाय खडा गर्ने योजना रहेको नगरपालिका प्रमुख दिलिपकुमार राईले जनाए। चालु आर्थिक वर्षमा स्वास्थ्य क्षेत्रका लागि १ करोडको बजेट नगरले विनियोजन गरेको थियो ।
