पाठ्यक्रम निर्माण गरिने, बीमा अभिकर्ता (एजेन्ट) बन्न परीक्षा पास गर्नु पर्ने

पाठ्यक्रम निर्माण गरिने, बीमा अभिकर्ता (एजेन्ट) बन्न परीक्षा पास गर्नु पर्ने

बीमा समितिले बीमा अभिकर्ताको लाईसेन्स वितरणका लागि परीक्षा लिने भएको छ । हाल १८ घण्टाको आधारभुत तालिम लिएको व्यक्तिलाई अभिकर्ताको लाइसेन्स दिने गरिएकोमा अब भने छुट्टै परीक्षा पास गर्नु पर्ने भएको हो ।

अहिलेको अवस्थामा एसलएसी वा एसईई उत्तीर्ण गरेर बीमा कम्पनीले यस सम्बन्धी १८ घण्टाको तालिम लिएकालाई अभिकर्ता लाइसेन्स दिने गरिएको थियो । अब छुट्टै पाठ्यक्रम बनाएर परीक्षा पास गरे पछि मात्रै लाइसेन्स दिने व्यवस्था गरिने बीमा समितिका अध्यक्ष सूर्यप्रसाद सिलवालले बताए । लामो समयदेखि यस विषयलाई अगाडि बढाउन खोजिएको भए पनि पछिल्लो घटनाले यसको आवश्यकतालाई थप बढाएको उनको भनाइ छ ।

अहिले तत्कालै त्यसो गर्दा सबै काम रोकिने भएकाले पाठ्यक्रम बनाएर त्यसको अधिनमा रहेर कम्पनीले नै परीक्षा लिने व्यवस्था गरिने र कालान्तरमा समिति आफैले परीक्षा लिने अध्यक्ष सिलवालको भनाइ छ । ‘केही समय पाठ्यक्रम बनाएर कम्पनीलाई नै दिने हो त्यस पछि समिति आफैले परीक्षा लिन्छ र सो परीक्षा पास भएका व्यक्तिहरु मात्रै अभिकर्ता बन्न पाउँछन्,’ उनले भने ।

बीमित र बीमकबीचमा समन्वय गराएर व्यवसाय विस्तारका लागि महत्वपूर्ण भुमिका हुने अभिकर्ताहरुले नियतवस नै बीमाको गलत प्रयोग गरेको घटनाहरु बाहिर आएपछि लाइसेन्स वितरणमा कढाइ गर्न लागिएको उनले बताए । अहिले योग्यता कति राख्ने भन्ने विषयमा छलफल भइरहेको उनको भनाइ छ ।

पछिल्लो पटक रिलायन्स लाइफ इन्स्योरेन्स लाइफमा अभिकर्ताकै मिलेमतोमा बाँकेमा बीमित सर्जन विकको नियोजित हत्या गरी दावी भुक्तानी बुझेको घटना बाहिरीए पछि समितिले यस्तो कदम चालेको हो । अहिले समितिमार्फत करिब साढे २ लाखले लाइसेन्स लिएको भए पनि करिब १ लाख जना मात्रै सक्रिय रहेका छन् ।

सम्बन्धित खवर

%d bloggers like this:
%d bloggers like this: