भीमराज अधिकारी, पथरी
मोरङको लेटाङ नगरपालिकाको छैटौँ नगरसभा शुक्रबार सम्पन्न भएको छ । नगर सभाले पुरक बजेट तथा कार्यक्रम मार्फत ३ ककरोड ४५ लाख ७० हजारको बजेट तथा कार्यक्रम प्रस्तुत गरेको छ । हाल सम्मको चालु खर्च ३१ प्रतिशत मात्रै भएको छ ।
चालु अवस्थामा रहेको ५० करोड ८६ लाख ५७ हजार बजेट मध्ये हाल सम्म ३१ प्रतिशत मात्रै खर्च भएको प्रगति विवरण उप प्रमुख कृष्ण कुमारी पोख्रेलले प्रस्तुत गर्नुभयो । चालु अवस्थामा पूर्वाधार विकास तर्फ २० करोड ५२ लाख २७ हजार रहेकामा माघ मसान्त सम्ममा २२.८ प्रतिशत अर्थात ४ करोड ६८ लाख ११ हजार रुपैँया मात्रै खर्च भएको छ । सामाजिक विकास तर्फ १७ करोड १५ लाख १७ हाजर मध्ये ४१.४५ प्रतिशत अर्थात ७ करोड ११ लाख २ हजार मात्रै खर्च भएको छ । आर्थिक विकास तर्फ २ करोड ३१ लाख ३९ हजार मध्ये १५.०८ प्रतिशत अर्थात ३४ लाख ९० हजार खर्च भएको छ । सुशासन तथा अन्तरसम्बन्धित क्षेत्रमा २ करोड ३१ लाख ३९ हजार विनियोजन भएकामा १३.९७ प्रतिशत अर्थात ३१ लाख ५७ हजार मात्रै खर्च भएको छ । यस्तै कार्यालय संचालन तथा प्रशासनिक खर्च तर्फ ८ करोड ६१ लाख ६४ हजार विनियोजन भएकामा ४० प्रतिशत अर्थात ३ करोड ४५ लाख २४ हजार मात्रै खर्च भएको हो । यसरी हेर्दा आर्थिक वर्ष २०७६/०७७ को जम्मा बजेटमा ३१ प्रतिशत मात्रै खर्च भएको पाइएको हो । हाल सम्मको उपलब्धी हेर्दा निकै सुस्त गतिमा खर्च भइरहेको देखिन्छ ।
शुक्रबारको नगरसभाले पुरक बजेट मार्फत पूर्वाधार विकासका लागि २ करोड १६ लाख ३० हजार, सामाजिक विकास तर्फ ५९ लाख ४० हजार, आर्थिक विकास तर्फ ९ लाख, सुशासन तथा अन्तरसम्बन्धित क्षेत्र विकास तर्फ ४७ लाख र कार्यालय संचालनका लागि १४ लाख रुपैया विनियोजन गरेको पोख्रेलले प्रस्तुत गर्नुभयो । केही योजनाहरु सम्पन्न भएका र भुक्तानी हुन बाँकी रहेको पोख्रेलको भनाइ छ ।
कार्यक्रममा नगर प्रमुख शंकर राईले चलिरहेका योजनाहरु, आगामी दिनमा संचालन गर्नका लागि बनाइएका रणनीति तथा कार्यक्रमहरुका बारेमा प्रकाश पार्नुभयो । लेटाङमा ‘‘मेरो सुविधा कटाइदेउ, फुसको छानो हटाइदेउ’’ कार्यक्रम निकै चर्चित बनेको छ । यसको संगसंगै नगरले दमकल, सव वाहन लगाएतको व्यवस्थापनमा पनि अगाढी बढेको राईले बताउनुभयो ।
यसअघि संविधान सभा सदस्य डिक बहादुर लिम्बूले कार्यक्रमको उद्घाटन गर्नुभएको थियो । कार्यक्रमलाई सम्बोधन गर्दै लिम्बूले कर्मचारीसंग समन्वय गरेर नगरको तिब्र बिकासमा जनप्रतिनिधिहरु लाग्नुपर्ने बताउनुभयो । स्थाइ सरकारको रुपमा रहेका कर्मचारीहरुसंगको टकरावले कुनैपनि हालतमा विकासले तिब्रता नपाउने लिम्बूको भनाइ थियो ।
कार्यक्रमका विशिष्ट अतिथि प्रदेश १ का सांसद उपेन्द्र घिमिरेले जनप्रतिनिधिहरुले आफ्नो मर्यादा कायम राख्नुपर्नेमा जोड दिनुभयो । नगरको विकासका लागि कुनै पाटि भन्दा पनि निस्वार्थ भावनाले सबैले लाग्नुपर्ने घिमिरेले बताउनुभयो । लेटाङको विकासका लागि सबैले एकजुट भएर अगाडी बढ्न पनि घिमिरेले अनुरोध गर्नुभयो ।
नगर सभामा नगरका सबै पाटिका प्रतिनिधिहरु, संघसंस्थाका प्रतिनिधि सहित सहभागी गराएको भन्दै सबै बक्ताहरुले नगरको प्रशंसा गरे । नेकपा, नेपाली कांग्रेस, समाजवादी पाटि लगाएत सबै प्रतिनिधिहरुले सभामा आफ्नो राय राखेका थिए ।
