सामुदायिक वनमा डोजर चल्दै, समितिका पदाधिकारी भन्छन् डोजर अनुमति लिनु पर्दैन

सामुदायिक वनमा डोजर चल्दै, समितिका पदाधिकारी भन्छन् डोजर अनुमति लिनु पर्दैन

भीमराज अधिकारी, पथरी
मोरङको एक सामुदायिक वनमा निर्वाद रुपमा डोजर चलाएर पोखरी निर्माण भइरहेको छ । पथरीशनिश्चरे नगरपालिका वडा नं. १ मा पर्ने शान्ति सामुदायिक वन क्षेत्रमा डोजरको प्रयोग गरिएको पाइएको हो ।

शान्ति सामुदायिक वनले पर्यापर्यटनको विकासका लागि शान्ति भुल्के सिमसार क्षेत्र पनि निर्माण गरिरहेको छ । सो सिमसारको गुरु योजना निर्माण भएकाले सो गुरु योजना अनुसार नै काम भइरहेको शान्ति सामुदायिक वन उपभोक्ता समुहकी सचिव मेनुका राईले बताइन् । राई शान्ति भुल्के सिमसार संरक्षण तथा विकास समितिकी संयोजक समेत हुन् । वनमा चलिरहेको डोजरका विषयमा राईले आफुहरुले डिभिजन वन लगाएतका कुनैपनि निकायमा अनुमति लिनु नपर्ने बताइन् । राईले भनिन् “हामीले हाम्रो गुरु योजना अनुसार काम गरिरहेका छौँ । हामीले वार्षिक साधारण सभाले सबैकुरा पास गरेका हुन्छौँ सोही आधारमा काम गर्ने हो । हामीले यसरी सबै कामका लागि जिल्ला धाइरहनु पर्दैन ।” उनले अझै थपिन “तपाइलाई थाहै छैन् होला सामुदायिक वनलाई असिमित अधिकार दिएको हुन्छ । हामीलाई काम गर्ने थुप्रै अधिकारहरु दिएको छ । यो डोजर चलाउनका लागि पनि अनुमति लिनु नपर्ने भएकाले समुहको योजना अनुसार नै चलाइएको राईले बताइन् ।”

यसरी वन क्षेत्रमा डोजर संचालनका लागि अनिवार्य रुपमा अनुमति लिनु पर्दछ । वन क्षेत्रमा विकासका नाममा कुनैपनि कंक्रिटका भौतिक संरचना पनि निर्माण गर्न पाइदैन । यस विषयमा मोरङ वन डिभिजनल अधिकृत विशाल घिमिरेले वनमा डोजर चलाउनका लागि अनिवार्य रुपमा अनुमति लिनु पर्ने बताए । घिमिरेले प्रदेश दैनिकलाई भने “वनमा डोजर चलाउन अनिवार्य अनुमति लिनु पर्दछ । शान्ति सामुदायिकको पनि त्यो प्रकृयामा रहेको छ । त्यहाँ मानिसले मात्रै सम्भव नहुने भएकाले मेसिन प्रयोग गर्नुभएको हो । अनुमति विना वनमा कंक्रिटको भवन निर्माण गर्न पनि मिल्दैन् ।”

अधिकृत घिमिरेले यसो भनिरहँदा वनको क्षेत्रमा अनुमति विना मेसिनरी औजार प्रयोग गर्न पाइदैन । तर सो संरक्षण तथा व्यवस्थापन समितिकै संयोजकले अनुमति नै लिनु पर्दैन भन्दा कता कता कुरो नमिलेको पाइयो । एका तर्फ समितिको मुख्य जिम्मेवार व्याक्तिले अनुमति लिनु नपर्ने भन्दै धमाधम वनमा डोजर चलाउनु अनि अधिकृतले अनुमति विना काम नै गर्न पाइदैन भन्नु तलमेल नै खाँदैन ।

पानी सुक्दै गएका कारण पानीको संरक्षणका लागि पोखरी निर्माण गरिएको राईले बताइन् । पानीको मुहानहरु पनि सुक्दै जाने र मासिने भएकाले पनि पोखरीको आवश्यकता भएको राईको भनाइ छ । राईका अनुसार यस आर्थिक वर्षमा काम सक्ने गरी भू–संरक्षण तथा जलाधार संरक्षण केन्द्रले ५ लाख रुपैया उपलब्ध गराएका कारण काम थालिएको हो ।

हाल निर्माण भएको पोखरी विचबाट नै पथरी खानेपानीका २ वटा पाइप विछ्याइएको छ । पथरी खानेपानीको मुहान पनि शान्ति सामुदायिक वनमा नै पर्दछ । सिमसारमा निर्माणाधिन माथिल्लो पोखरीमा पानीको पाइप समेत फुटेको छ । पाइप फुटेर जोडिएको ठाउँबाट पानी प्रसस्तै बाहिर आएको छ । सोे फुटेको ठाउँबाट पोखरीको फोहोर पानी पाइपबाट खानेपानीको ट्याङ्कीमा आउने सम्भावना प्रवल देखिन्छ । अर्को तर्फ पोखरी निर्माण गरिएको स्थानमा भएका रुख विरुवाहरु पनि नास भएका छन् । सो विरुवाहरु अन्य स्थानमा थिनिङ पुनिक कार्यक्रममा रोपिने राईले बताइन् ।



सम्बन्धित खवर