कर्णाली प्रदेशमा एमालेको सरकार अल्पमतमा, यस्तो कर्णाली प्रदेशको गणित
कर्णाली प्रदेशको सरकार अल्पमतमा परेको छ । सत्ता सहयात्री दल नेपाल कम्युनिष्ट पार्टी एमालेले सरकारलाई दिएको समर्थन फिर्ता लिएपछि महेन्द्रबहादुर शाही नेतृत्वको सरकार ढल्ने अवस्थामा पुगेको हो ।
बुधबार बसेको एमालेको संसदीय दलको बैठकले माओवादीबाट मुख्यमन्त्री भएका शाही नेतृत्वको सरकारलाई दिएको समर्थन फिर्ता गर्ने निर्णय गरेको छ । बैठकले एमालेबाट सरकारमा सहभागी तीनै जना मन्त्रीलाई फिर्ता बोलाउने निर्णय समेत गरेको छ । एमाले प्रदेश सभाका संसदीय दलका नेता यमलाल कँडेलले सरकारलाई दिएको समर्थन फिर्ता लिने निर्णय बैठकबाट भएको बताउनु भयो । ‘हामीले मुख्यमन्त्री महेन्द्रबहादुर शाहीको सरकारलाई दिएको समर्थन फिर्ता लिने निर्णय गरेका छौं,’ बैठकपछि आयोजित पत्रकार सम्मेलनमा कँडेलले भन्नुभयो, ‘आगामी चैत ५ गतेदेखि त्यो लागू हुनेछ ।’
बैठकमा १९ जना सांसद्मध्ये १० जना सहभागी भएका छन् । अनुपस्थित ९ जना सांसद्लाई स्पष्टीकरण सोध्ने निर्णय पनि बैठकले गरेको छ । ‘किन उपस्थित नभएको हो भन्ने बारेमा लिखित स्पष्टीकण सोध्ने निर्णय गरेका छौ । त्यसका अलावा नेकपा एमालेबाट सरकारमा सहभागि तीनजना मन्त्रीलाई तत्काल फिर्ता हुन निर्देशन दिने निर्णय गरेका छौ’, उहाले भन्नुभयो ।
कर्णाली प्रदेश सरकारमा एमालेबाट आर्थिक मामिला तथा योजना मन्त्री प्रकाश ज्वाला, सामाजिक विकास मन्त्री दल रावल र उद्योग पर्यटन वन तथा वातावरण मन्त्री नन्दसिंह बुढा रहनु भएको छ ।
यस्तो कर्णाली प्रदेशको गणित
कर्णाली प्रदेशको कुल ४० सांसदमध्ये एमालेका २० सांसद छन् । जसमध्ये एक जना सभामुख रहनु भएको छ । यो प्रदेशमा माओवादी केन्द्रका महेन्द्रबहादुर शाही मुख्यमन्त्री छन् । उहाको पार्टीले १३ सिट पाएको छ भने कांग्रेसले ६ र राप्रपाका एक सांसद छन् । यहा एमालेलाई सरकार बनाउन थप १ सांसद आवश्यक छ भने शाहीलाई पद टिकाउन एमालेको साथ नभई हुँदैन । कर्णालीमा एमाले बिनाको सरकार नै बन्न नसक्ने अवस्था रहेको छ ।