पोखरा : पोखरा-५ पस्र्याङ्मा एकै ठाउँमा ११ वटा चित्रकूट नाम गरेका चरा मृत अवस्थामा भेटिएका छन् । आइतबार दिउसो स्थानीय कञ्चन थापा कोइरालाको घरको बरण्डामा चार वटा चित्रकूट नामका चरा आकाशबाट घाइते अवस्थामा खसेका थिए। ‘पानी खुवाएपछि एउटा भुर्र उडेर गयो,’ उनले भनिन, ‘तीनवटा पानी खुवाउँदै गर्दा हातमै मरे ।’
घर अगाडीको भुइँमा पनि आकाशबाट एक्कासी ९ वटा यही प्रजातीका चरा खसेको र पानी खुवाएपछि एउटा उडेको र अरु ८ वटालाई बचाउन नसकिएको उनले सुनाइन् । एकै पटक यति धेरै संख्यामा चरा पहिलो पटक आफ्नै आँखा अगाडि मरेको देख्दा निकै दुःख लागेको थापाले बताइन्। यसरी चरा मरेपछि उनले फोटोसहित सामाजिकल संञ्जालमा चरा मरेको बारेमा लेखेकी थिइन्।
‘चरा ठोक्किएर घाइते हुने अवस्था पनि यहाँ छैन’, उनले भनिन, ‘अहिले पोखराको तापक्रम आकाशबाट चरा उड्दा उड्दै खस्ने अवस्थाको पनि छैन । कसरी चरा एक्कासी आकाशबाट खसे आश्र्यलागेको छ।’
पोखरा पंछी समाजका अध्यक्ष मनशान्त घिमिरेले यो प्रजातीका चरा अहिले माथिल्लो क्षेत्रबाट कम उचाइको क्षेत्र ३ सय ५० मिटरसम्म चुरेभावरतर्फ जाने समय भएकोले उड्ने क्रममा ठोकिएर घाइते हुन सक्ने सुनाए । तस्बिरमा देखिएका चरा अल्प वयस्क भएकोले पनि यी चराहरुले बाटो पहिल्याउन नसक्दा ठोक्किएर घाइते भएको हुन सक्ने उनले बताए ।
यो प्रजातिका चरा ३ सय ५० देखि १४ सय ५० मिटर उचाईसम्म पाइन्छ । यो प्रजातीको चरा घर आगनको गाँडेनमा पाइने चरा नभएर वनमा पाइने जंगली प्रजातिको चरा हो ।
पोखरा- १८ मेथलामा पनि यो प्रजातीका चरा पाइने र यहाँ गुड पनि लगाउँने गरेको पाइएको समाजका अध्यक्ष घिमिरेले जानकारी दिए । चित्रकूट नामको चरा के कसरी मरेका हुन भन्ने एकिन गर्न मरेका चरा ल्याएर ल्याबमा स्याम्पल पठाइएको डिभिजन वन कार्यालय कास्कीका प्रमुख केदार बरालले बताए । रिपोर्ट आएपछि के कसरी चरा मरेको हो भन्ने एकीन हुने बरालले जानकारी दिए ।
