कोशी अस्पताल विराटनगरको आइसोलेशनमा भर्ना हुने क्रममा मंगलबार विहान मृत्यु भएका उदयपुरको बेलका नगरपालिकाका बेदप्रसाद न्यौपानेमा कोरोना संक्रमण नभएको पुष्टि भएको छ ।
श्वासप्रश्वासमा समस्या र ज्वारो आएपछि विराटनगरको विराट मेडिकल कलेजमा आएका उनलाई कोरोना संक्रमण भएको आशंकामा कलेजले भर्ना नलिएपछि कोशी अस्पताल आउँदा भर्ना हुन नपाई मृत्यु भएको थियो ।
मृत्युपछि स्वाब संकलन गरेर कोरोना परीक्षण गर्दा नेगेटिभ देखिएको कोशी अस्पतालकका मेडिकल सुपरिटेन्डेन्ट डा।चुमनलाल दासले जानकारी दिनुभयो । बेलका नगरपालिका–१ का ५५ वर्षीय न्यौपानेको मंगलबार बिहान १ बजे मृत्यु भएको थियो ।
ज्वरो आउने, रिँगाटा चल्ने, वाकवाकी लाग्ने, श्वास फेर्न गाह्रो हुनेलगायत कोरोनासँग मिल्ने लक्षण देखिएकोले उनमा कोरोना भएको आशंका गरिएको थियो । उनको रिपोर्ट नगेटिभ आएर कोरोना संक्रमण नभएको पुष्टि भएपछि शव परिवारका सदस्यलाई जिम्मा लगाइएको अस्पतालले जनाएको छ ।