पोखराको विजयपुर पुलमा आवतजावत रोकेर मर्मत कार्य शुरु

पोखराको विजयपुर पुलमा आवतजावत रोकेर मर्मत कार्य शुरु

पोखरा : पृथ्वीराजमार्ग हुँदै मुख्य पोखरा बजार क्षेत्र प्रवेश गर्ने नाकामा जीर्ण बनेको विजयपुर पुल मर्मतको काम थालिएको छ ।

गत वर्ष ११ ठाउँबाट बटम कड भाँच्चिए (क्रयाक) पछि २३ ठाउँबाट स्टिल पाता गाँसेर टेको लगाइएको थियो । बर्खाको समय सुरु हुनैसाथ विजयपुर खोलाबाट बेसमेन्ट उठाई लगाइएको टेको पानीले बगाएको छ ।

जीर्ण पुलको पुलचोक इन्जियरिङ क्याम्पसबाट डा. भरत मण्डलको टोलीले १ वर्ष अघि नै अध्ययन गरेको थियो ।

अध्ययन प्रतिवेदनले पुलको विकल्पमा नयाँ पुल निर्माण गर्न र जीर्ण पुललाई नै मर्मत गरेर सञ्चालनमा ल्याउन सुझाएको सडक डिभिजन पोखराका प्रमुख सुनिलबाबु पन्तले जानकारी दिए ।

दीर्घकालीन समाधानमा नयाँ पुल बनाउने भन्ने नै छ । तर अल्पकालीन समाधानका लागि सोही पुल मर्मत गर्नु नै उपयुक्त हुने देखियो,’ उनले भने, ‘बेलिब्रिज हुँदाहुँदै किन ? भन्ने हुनसक्छ । बेलिब्रिज अस्थायी पुल हो । यसको भारवहन क्षमता पनि न्यून छ ।’

पुल मर्मतका लागि सडक डिभिजनबाट टेन्डर आह्वान भई असार पहिलो सातामै जलप नेपाल प्रालिले १ करोड ३९ लाखमा काम सम्पन्न गर्ने गरी ठेक्का लिएको छ ।

साउनमै सम्पन्न गर्नेगरी कम्पनीलाई काम गर्न भनेपनि सम्झौता म्याद पुससम्म दिइएको डिभिजन प्रमुख पन्तले जानकारी दिए । राजमार्गमा अध्यधिक भारवहन क्षमता भएका सवारी गुडिरहने र ठूला आयोजनाका सामग्री ढुवानीमा भइरहेको समस्या टार्नलाई पनि पुलको तत्कालै मर्मत थालिएको उनले बताए ।

कम्पनीले पुलको वारपार नै बटम कडको सर्पोटको लागि चेम्बर गाँस्ने छ । यसअघि भाँच्चिएको ठाउँमा मात्र चेम्बर राखिएको थियो । बटम कड फेर्न सम्भव नहुने भएकाले मर्मत नै गर्नुपरेको डिभिजन प्रमुख पन्तको भनाइ छ ।

नयाँ पुल निर्माणबारे भने सडकमा कुनै पनि योजना नरहेको उनले बताए । पोखरा–मुग्लिन सडक खण्ड ४ लेनमा निर्माण गर्ने आयोजनामा विजयपुल खोलामा पनि नयाँ पुल आवश्यक पर्ने हुँदा उक्त आयोजना अन्तर्गतनै समावेश हुनसक्ने पन्तले सुनाए ।

सम्बन्धित खवर